E tika ana ngā kawatau o ngā tāngata katoa o te ao tākaro i Aotearoa nei, arā, kia haumaru rātou, kia matatika hoki ō rātou wheako. Me kaua hoki ēnei āhuatanga e pākia ki te whakakonuka.
Koirā pū te take i whakatūria ai Te Kahu Raunui. I whakatūria mātou ki te mātua whakarite kia whakapono — kia ngākau titikaha hoki — ngā tāngata katoa e haumaru ana, e matatika ana anō hoki te tākaro ki Aotearoa.
I waihangatia te Kōmihana i muri iho i ētahi takunetanga i roto i ngā tini tau. Nā ētahi arotake motuhake (nō konei, nō tāwāhi hoki) i hura ake te whakaweti, te takahi tangata, me ētahi atu whanonga kino. Nā konā i whakaritea ai e te kāwanatanga tētahi ohu mahi mā rātou e tohutohu te ara pai hei whāinga ki te whakahaere i te ngākau pono ki roto i te ao tākaro i Aotearoa. Koinei ngā tohutohu a te ohu mahi:
me whakatū tētahi whakahaere hou e motuhake ana
me whakauru mai te Drug Free Sport New Zealand ki roto i tēnei whakahaere
me whakarewa ētahi paerewa mōkito mō te ngākau pono i roto i te ao tākaro.
Nā runga i ēnei tohutohu, ka whakarewahia e te kāwangatanga te Integrity Sport and Recreation Act 2023. Nā tēnei Ture i whakatū te Kōmihana, kei roto i tēnei Ture ko ō mātou takohanga.
Nō te 1 o Hūrae 2024 ka whakatuwherahia te Kōmihana hei ‘hinonga Karauna motuhake’. Ko tā ngā hinonga Karauna he whakahaere i ētahi ratonga pāpori e motuhake ana. Nā reira ko ā mātou tohutohu he tōkeke. Ka mutu, ka taea e mātou te āwhina i ngā whakataunga raruraru, engari ka noho mātou hei hoa kiritoru e whakaraupapa ana.